|
Der Kreßbaum
Dies Johr – säht Opa – mache ich ens der
Kreßbaum parat,
der schmöcken ich dann op ming eijene Aat.
Er jing eran an dat jroße Werk,
doch vürher hätt er sich met enem Kognak
jestärk.
Bewaffnet met Kognak, met Säge un Hammer,
söch er dä kromme Baum – wat ene Jammer-
wie soll mer nur – et es nit zom laache
us der Kröck ene schöne Kreßbaum mache.
Zoesch hät hä e paar Ääß erus jeschnibbelt
Dann ens widder am Kognak jenibbelt.
Dann wood der Baum en der Ständer jesatz
denn für der Schmuck bruch mer jo vill
Platz.
Se brachten ihm de Keß met de Kugele eran,
er schott sich noch ene Kognak en –
un säht – ich bruche och noch Engelshoor –
hoffentlich sin och jenoch Kääze do.
Die Wanduhr schloch ald alver drei –
woröm machen die dann su ne Buhei,
de Kreßbaum schmücke es doch janit schwer,
die Kognakfläsch wor ald halv leer.
De Zeiger röckten wigger – et wor schon vier
Do kloppt et drußen an de Dür,
er hät ävver kein Zick - er wor am wöhle,
zweschendurch dät er widder de Mandele
spöle.
De Dür hat er vorsichtshalber avjeschlosse
Un dät arbeite – stell un unverdrossen,
et sollt ihn hück jo kener stüre,
ußer Weihnachtsmusik wor nix ze hüre.
Et wor ald düster – jing op fünf Uhr an,
de Oma reef – nu halt dich dran,
mer welle beschere su öm sechs –
jo säht de Opa – ävver ich ben jo kein Hex.
Su koot für sechs – wood et dene ze bunt,
mach de Dür op – söns jeit et rund.
Du beß doch fädig met der Schmöckerei –
Die Dür jing op – de Oma leet ne Schrei.
Oh jömmich reef sei – ich kann nit mieh,
su ne schöne Baum hatte mir noch nie,
alles reef – Opa dat es en Meisterstück
wat häste jemaat met dem Baum – us der
Kröck?
Funkelnd un bletzend em helle Kääzesching,
zwesche Engelshoor – dä Baum voll
Fastelovendsorden hing.
Un janz bovven – huh en der Spetz,
hing dem Opa sing ahle Präsidente – Mötz.
Vun dä blaue un de rude Funken –
Der Ehrengarde un Ald Lunke –
beß zo de löstigen Paulaner un dem Jan vun
Wäät
hing alles do – wat Rang un Name em
Fastelovend hätt.
Voll wie en Haubitz – de Kopp voll
Engelshoor
stunt der Opa wie de Erzengel Gabriel do,
en der Hand die leere Kognakfläsch
nohm er en Hand voll Kamelle us der Täsch,
hehlt sich schwankend faß am Schaaf –
schmeß die Kamelle un reef – Kölle Alaaf!
_________________ 
|
